濁水溪公社【農村出事情】Tâi-gí Pe̍h-ōe-jī 台語白話字歌詞

【Lông-chhun Chhut-tāi-chì 農村出代志】

Ū-siáⁿ-mih lí-iû, uī siáⁿ-mih sòo-kiû? khí-moo bē-sóng pàng-sái pàng bē-chhut!
有啥乜理由　有啥乜訴求　起毛未爽　放屎放未出

Kóng-chhut sim-lāi ê hoân-ló-sū, mài hia ku-ku-moo-moo ké-ké-sian-sian kiaⁿ ē chhut-tāi-chì.
講出心內个煩惱事　勿遐龜龜毛毛　假假仙仙　驚會出代志

Ūi-siáⁿ-mi̍h oàn-thàn? ūi-siáⁿ-mi̍h tu̍h-lān? lim--tio̍h Pa-la-song, khàu lóng khàu-bōe-chhut!
為啥乜怨嘆　為啥乜突卵　飲着巴拉松　哭朗哭未出

Chhin-chhiūⁿ hái-éng teh chìm-hái-poo tio̍h-sī chi-chi-bai-bai khe̍h-khe̍h-hâiⁿ-hâiⁿ hái-chha̍t ké-lia̍h-hî.
親像海湧塊浸海埔　着是芝芝屄屄　挈挈還還　海賊假掠魚


A-pa lâu-phīⁿ-hoeh, a-má bián pháiⁿ-sè, niá-chîⁿ tà-kè lâi sio-kheh.
阿爸流鼻血　阿媽免歹勢　領錢逐家來相kheh（華語：擠）

Koe-chí teh seⁿ-thâng, lô-chúi-bí mah tàu-sio-kāng. Tâi-phiò tui kah móa-soaⁿ chhiⁿ-âng.
果子塊生蟲　濁水米嘛鬥相共　台票堆甲滿山青紅

Chia̍h-pá chit-tǹg, ūn-miā ū kng, ò-lo̍h hiong-thóo Saⁿ-tiám-pòaⁿ.
食飽一頓　運命有光　懊落鄉土三點半

Chhân-hn̂g chìm chúi-pûi, si-koe thó-thàn bōe khin-sang, hōo lán chú-lâng chiah bōe khang.
田園浸水肥　西瓜討趁袂輕鬆　予咱主人食袂空

Chù-kái 註解：
1. 「khí-moo 起毛」是台語化ê日語，原文是「気持ち Kimochi」。
2. 「tu̍h-lān 突卵」tu̍h是thok戳、chhì刺、thuh托ê動作；卵是「lān-pha膦脬」ê「lān」；「突卵脬」看字着感覺足疼neh。接近Chiná有一句網路流行語「蛋疼」。
3. 「chi-bai 芝屄」 頂一句朗寫着男性ê seng-si̍t khì-koan生殖器官ah，這个芝屄着是女性ê生殖器官。
4. 「挈挈還還」khe̍h 挈，拿取、提走；hâiⁿ（hêng）歸回原主。
5. 「sio-kheh 相kheh」kheh接近華語「擠」ê意思，閣有「kheh燒」這種講法。
6. 「ò-lo̍h 懊落」 華語：沮喪。歌手有北部腔，發音像「òo--loh 挖落」？


Āu-kì 後記：

【預告】5月5日May Jam2019＠新化虎頭埤

※ Goân-té Chhe-sì pòaⁿ-mî ián-chhut, keng-kòe tiâu-chéng kái kàu Gōo-goe̍h Chhe-gōo 12:00~12:40.
※ 原底初四半暝演出，經過調整改夠五月初五(拜日)中晝12:00~12:40。

先來一个May Jam歌仔頭：
 

Tâi-lâm Gōo-goe̍h Im-ga̍k-kùi,
Lāu-jia̍t chiat-bo̍k chi̍t-tōa-tui,
Hóo-thâu-pi sī hó hong-súi,
Koan-chiòng pêng-iú chiàm-hó-ūi.

Hiong-chhin pêng-iú thiaⁿ góa káng,
Sió-tī pún-sin Tâi-lâm-lâng,
Lâi-kàu Sin-hòa Tōa-ba̍k-kàng,
Goe̍h-khîm liām-koa hōo lín phīⁿ-phang.


台南五月音樂季
鬧熱節目一大堆
虎頭埤是好風水
觀眾朋友佔好位

鄉親朋友聽我講
小弟本身台南人
來夠新化大目降
月琴唸歌(予)恁鼻芳

五月初四，拜六暗時
五月初五，禮拜中晝12點夠12點40分；佇新化虎頭埤，等你來喔！

時間	樂團的名字	音樂風格	城市
12:00 – 12:40	Chonbûnsé	民謠 藍調 搖滾	台南
12:50 – 13:30	Yang Yang Cao	original/indie	台南
13:40 – 14:20	Kadena 28	菲律賓搖滾	菲律賓
14:30 – 15:10	Temple Smoke	hard rock/ stoner	台南
15:20 – 16:00	Lousi Band	progressive rock	印度尼西亞
16:10 – 16:50	Monkey Banana	民謠搖滾	台中
17:00 – 17:40	Karie & ooo	ACG/POP/Anikura	高雄
17:50 – 18:30	Apes Apocalypse	Ape Rock!	高雄
18:40 – 19:20	Akuba Funk	放克音樂	台南
19:30 – 20:10	2nd Wave	Nu-Metal	高雄
20:20 – 21:00	Irie Givens & NCKU Jazz B.	嘻哈;藍調	台南
21:10 – 21:50	Gunbridge	Power metal	日本/台  南

May Jam官方網站 → https://www.mayjam.com/lineup/

紅字着是我無毋着lah，本底寫「Chomunse」，我寫批去講了才改，ah結果嘛是寫毋着去哈哈
=A=
明明我報名ê時陣着寫「Chanbûnsè MUSIC ART」，可能Pe̍h-ōe-jī是卡無人熟似？
※ 原底五月初四演出，經過調整改夠初五(拜日)中晝12:00~12:40。

※ 順紲整理四、五月演出消息：

№ 06, 4/09@自由之聲廣播電台訪談
№ 07, 4/13@府城舊冊店「搖天滾地月琴唸歌」
№ 08, 4/27@安平 台南流浪動物協會

№ 09, 5/05@新化 May Jam 2019（12:00~12:40）

№ 10, 5/10@歸仁 大潭國小社團成果發表

№ 11, 5/18@成功大學 台南流浪動物協會（南榕廣場）

№ 12, 5/23(四)@南區 仁愛日間照顧中心

№ 13, 5/25@安平 台南流浪動物協會

[唸歌] 搖天滾地困難生活節 第二抱：2013困難起行

Chêng chip kóng liáu 2012 khùn-lân-nî, soah--lâi khùn-lân kha-pōo kè-siok lâi kā tah lo̍h--khì...
前集講了2012困難年，煞來困難跤步繼續來共踏落去...

[唸歌] 搖天滾地困難生活節 第一抱：2012困難年
→ https://chanbunse.blogspot.com/2019/04/2012.html

Tē-jī-phō: Khùn-lân Khí-kiâⁿ	第二部：困難起行
(15) Nn̄g-chheng Cha̍p-saⁿ hit-chi̍t-tang, Seng-oa̍h piàn-kòa chin bô-kâng, Thâu-ke chhōe góa khì Khai-káng, góa Sî-thâu-lōo cho chū-iû-lâng.	(15) 兩千十三彼一冬 生活變卦真無仝 頭家揣我去開講 辭頭路做自由人
(16) Khùn-lân-seng-oa̍h lâi khí-kiâⁿ, Sì-kè hòng-sàng lán sim-siaⁿ, Pêng-iú sio-chio chòe-tīn thiaⁿ, M̄-kiaⁿ khùn-lân sim hoāⁿ tiāⁿ.	(16) 困難生活來起行 四界放送咱心聲 朋友相招做陣聽 毋驚困難心扞定
(17) Lī-khui Tâi-pak ê hi-hoa, Gán-kài tian-tò khah khui-khoah, Lâi kàu Āu-soaⁿ Tang-hái-hoāⁿ, Chio̍h-á iô-kún ná chhiòⁿ-koa.	(17) 離開台北个虛花 眼界顛倒較開闊 來到後山東海岸 石仔搖滾若唱歌
(18) Rock&Roll kóng tn̂g-té, Im-ga̍k bô-lūn koân iah kē, Hó-thiaⁿ pháiⁿ-thiaⁿ chāi-lâng gē, Sè-kan im-ga̍k sī chin-chē.	(18) 搖滾樂來講長短 音樂無論懸抑下 好聽歹聽在人詣 世間音樂是真儕
(19) Fudafudak ê hái-piⁿ, Amis kóng i Siám-siám-sih, Châi-thoân chiàm-tē chò seng-lí, Thian-jiân soa-poo B.O.T.	(19) Fudafudak ê海邊 Amis講伊閃閃熠 財團佔地做生理 天然沙埔B.O.T.
(20) Lâi thiaⁿ chāi-tē ê sim-siaⁿ, Tâi-tang ûi-it ê Hái-soa-phiâⁿ, Hái-bīn siám-sih ê kng-iáⁿ, Fudafudak i ê miâ.	(20) 來聽在地个心聲 台東唯一ê海沙坪 海面閃熠个光影 Fudafudak伊ê名
(21) Hái-piⁿ pn̄g-tiàm Bí-Lē-Oan, Phò-hoāi khoân-kéng Kòo-lâng-oàn, Chèng-hú chin-chiàⁿ m̄-sī-khoán, Bí-lē hái-hōaⁿ sit chú-koân.	(21) 海邊飯店美麗灣 破壞環境顧人怨 政府真正毋是款 美麗海岸失主權
(22) Chū-jiân khoân-kéng ài siú-hōo, Jîn-bûn tē-kéng mah ài kòo, Oāⁿ kóng Tâi-lâm Thih-ki-lōo, Kiông-pek poaⁿ-chhù lâng kan-khóo.	22 自然環境愛守護 人文地景嘛愛顧 換講台南鐵枝路 強迫搬厝人艱苦
23 Chāi-tē siàu-liân ê thoân-thé, Kí-pān Lâm-thih Gē-bûn-chè, Khòng-cheng sòo-kiû kóng siông-sè, Thih-lōo sóa-ūi chhióoⁿ thóo-tē.	23. 在地少年个團體 舉辦南鐵藝文祭 抗爭訴求講詳細 鐵路徙位搶土地
24 Sió-tī pún-sin Tâi-lâm-lâng, Im-ga̍k ián-chhut tàu-saⁿ-kāng, Koan-sim gī-tê kúi loh tang, Tùi-ōe lí-kái bô khin-sang.	24. 小弟本身台南人 音樂演出鬥相共 關心議題幾落冬 對話理解無輕鬆
25 Lâm-thih sóa-ūi thiah lâng-ê-chhù, Siá-chò Koa-á Tong Bú Hù, Tn̂g-phiⁿ chhit-jī-á koh ū Tàu-kù, Chiâⁿ-si̍t Khùn-lân ê jīm-bū.	25 南鐵徙位拆人ê厝 寫做歌仔Don't Move 長篇七字á閣有鬥句 誠實困難个任務
26 Lâi kàu Tâi-tiong chàu koa-siaⁿ, Khùn-lân sûn-hôe kè-sio̍k kiâⁿ, Hāng-á-lāi ê Ka-pi-thiaⁿ, Ga̍k-thoân pêng-iú chòe-tīn piàⁿ.	26 來夠台中奏歌聲 困難巡迴繼續行 巷仔內个咖啡廳 樂團朋友做陣拚
27 Tōa-tōo-soaⁿ-á Ga̍k-gî-tūi, Che miâ bē-su teh pûn Kóo-chhui, M̄-sī thang lâng teh húi-lūi, In sī chin-chiàⁿ bat sī-hui.	27. 大度山á樂儀隊 這名袂輸塊歕鼓催 毋是通人塊匪類 怹是真正捌是非
28 Liām-koa kàu chia seng siu-soah, Tán góa pian liáu koh lâi sòa-thoaⁿ, Jîn-chêng sè-sū chiâu piàn-hòa, Thoân-sêng bûn-hòa siá sin-koa.	28 唸歌夠遮先收煞 等我編了閣來紲攤 人情世事齊變化 傳承文化寫新歌
29 Chāi-chō thiaⁿ-liáu nā ū chhù-bī, Iú chhiáⁿ pêng-iú tàu chi-chhî, Goán ū T-shirt kap CD, Lóng sī hó-mih bián hoâi-gî.	29. 在座聽了若有趣味 有請朋友鬥支持 阮有T恤佮CD 朗是好物免懷疑
30 Seng-oa̍h khùn-lân ê sè-kài, Ūi chîⁿ kan-khóo gōng-tōa-tai, Chi̍t-tiâu phiat-pōo pò lín chai, Chia̍h pá khùn pá chhiò-hai-hai.	30 生活困難个世界 為錢艱苦戇大呆 一條撇步報恁知 食飽睏飽笑咍咍

Chanbûnsè 曾文細 自編自彈自唱
主要使用「Kang-ôo-tiāu 江湖調」
19 ~ 21(Fudafudak 美麗灣事件)使用「Tâi-tang-tiāu台東調」來做「過板」

美麗ê東海岸
石仔「搖滾」若唱歌

第三抱：正宗困難負二代
→ https://chanbunse.blogspot.com/2020/01/blog-post.html

第四抱：2015困南北
→ https://chanbunse.blogspot.com/2020/02/2015.html 

[唸歌] 搖天滾地困難生活節 第一抱：2012困難年

Tn̂g-phiⁿ Iô-kún Sú-si！長篇搖滾史詩！

【Iô-thiⁿ-kún-tē Khùn-lân Seng-oa̍h-cheh 搖天滾地困難生活節】

Tē-it-phō : 2012 Khùn-lân-nî	第一部：2012困難年
(01) Liām-koa sòo-kiû lán sim-siaⁿ, CD hō-miâ kiò im-kiaⁿ, Khùn-Lân seng-oa̍h sī ū-iáⁿ, 22K kui soaⁿ-phiâⁿ.	(01) 唸歌訴求咱心聲 CD號名叫「音驚」 困難生活是有影 「22K」規山坪
(02) Goe̍h-kip 2-bān 2-chheng-khoo, Kan-khóo koh m̄ káⁿ sî thâu-lōo, Kut-la̍t phah-piàⁿ kò͘ pak-tóo, soah Ta̍k-put-sî á teh chia̍h-thôo.	(02) 月給兩萬兩千箍 艱苦閣毋敢辭頭路 骨力拍拚顧腹肚 soah逐不時仔塊食塗
(03) Nn̄g-chheng Cha̍p-jī hit-tong-nî, KánTan-seng-oa̍h-cheh beh khai-sí, Pò-miâ lo̍k-soán chin siù-khì, Kui-khì ka-tī pān khah chhù-bī.	(03) 「2012」彼當年 簡單生活節欲開始 報名落選真受氣 規氣家己辦較趣味
(04) Oa̍h-tāng siat tī Bīn-chú--chheh, ián-chhut chu-keh bô hān-chè, Khùn-lân-ián-chhut piàⁿ kàu-té, Kán-tan-seng-oa̍h hông khau-sé.	(04) 活動設佇面子冊 演出資格無限制 困難演出拚夠底 簡單生活夆剾洗
[Liām-pe̍h]: Kán-tan--ê khì hōo Siǎng khau-sé neh? Tong-jiân tio̍h-sī lán “Khùn-lân-seng-oa̍h-cheh” (i i i ...)	「唸白」： 簡單ê去予「啥人」剾洗neh？ 當然着是咱「困難生活節」（咿咿咿～）
(05) M̄-nā sī teh kóng chhiò-khoe, Khùn-lân ián-chhut ū kè-ōe, Siōng-kiaⁿ tiôⁿ-tē chhut būn-tôe, Phah-sǹg beh-lâi Bih-sio-chhōe.	(05) 毋但是塊講笑詼 困難演出有計劃 上驚場地出問題 拍算欲來覕相揣
(06) Hôa-san-chiú-chhióⁿ pān oa̍h-tāng, 12 goe̍h chhe-it hit-chi̍t-kang, Bûn-chhòng-hn̂g-khu chē-chē lâng, Lo̍h-hō͘-thiⁿ ah bē khin-sang.	(06) 華山酒廠辦活動 12月初一彼一工 文創園區濟濟人 落雨天矣未輕鬆
(07) Sin-seng-kiô kha bih hōo-chúi, M̄-kiaⁿ hong-hōo chiâⁿ hó-ūi, Koan-chiòng pêng-iú kui tōa tui, Thoân-soat ê tōa-mn̂g ùi chia khui.	(07) 新生橋跤覕雨水 毋驚風雨誠好位 觀眾朋友規大堆 傳說ê大門ùi遮開
(08) Khì-châi siat-pī chin iú-hān, Beh pān ián-chhut bô kán-tan, Hiān-tiôoⁿ ū-iáⁿ chiâⁿ Khùn-lân, Kám-siā pêng-iú tàu pang-chān.	(08) 器材設備真有限 欲辦活動無簡單 現場有影誠困難 感謝朋友鬥幫贊
(09) Im-hióng Mài-khut chhut tāi-chì, Hiông-hiông thái-ē bô-tiān khì? M̄ chai án-choáⁿ lâi chhú-lí, Ut-chut oàn-chheh bô-liáu-sî.	(09) 音響Mic出代誌 雄雄thái會無電去？ 毋知按怎來處理 鬱卒怨慼無了時
(10) Bô-tiān tó-ūi thó kiù-peng? Chit-sî Kî-chek lâi hoat-seng, Kòe-lōo pêng-iú kiâⁿ hiòng-chêng, Hiān-tiôⁿ Koa-bú tiám kong-bêng. Kòe-lōo pêng-iú tàu sio-théng, Koa-bú pun-tioⁿ poa̍h kám-chêng.	(10) 無電佗位討救兵 這時奇蹟來發生 過路朋友行向前 現場歌舞點光明 過路朋友鬥相挺 歌舞分張跋感情
(11) Kán-tan-seng-oa̍h loh tōa-hōo, Ta̍k-ê lóng-chóng tâm-lok-lok, Pâi-tūi ji̍p-tiôⁿ tán poàⁿ-poo, Kui-khì lâi kiâⁿ Khùn-lân-lōo.	(11) 簡單生活落大雨 逐个攏總澹漉漉 排隊入場等半晡 規氣來行困難路
(12) Khùn-lân-seng-oa̍h-cheh sio thǹg-thǹg, Kán-tan--ê pêng-iú mah lâi sńg, Chi̍t-lōo iô-kún kàu e-hng, Ka-chài lōo-piⁿū tiān-hóe-kng.	(12) 困難生活節燒燙燙 簡單ê朋友嘛來耍 一路搖滾夠下昏 加再路邊有電火光
(13) lán Sū-sian ū thong-ti koh pài-hāu, Kán-tan--ê hoaⁿ-hí ū lán thuh-chhàu, Iô-thiⁿ-kún-tē siang-pêⁿ-tàu, Khùn-lân Kán-tan lóng chin-gâu.	(13) 咱事先有通知閣拜候 簡單ê歡喜咱托臭 搖天滾地雙棚鬥 困難簡單朗真𠢕
(14) Khùn-lân seng-oa̍h choân sè-kài, Khí-chò lán ka-tī ê bú-tâi, Tián-hiān to-goân ê sek-chhái, Iú-chhiáⁿ pêng-iú chòe-tīn lâi.	(14) 困難生活全世界 起造咱家己ê舞台 展現多元ê色彩 有請朋友做陣來

「簡單生活落大雨，排隊入場等半晡…」

 

「一路搖滾夠下昏，加再路邊電火光。」

Soah--lâi koh ū Tē-jī-phō：2013 Khùn-lân Khí-kiâⁿ
煞來閣有第二抱：2013困難起行！
→ https://chanbunse.blogspot.com/2019/04/2013.html

第三抱：正宗困難負二代
→ https://chanbunse.blogspot.com/2020/01/blog-post.html

第四抱：2015困（難）南北
→ https://chanbunse.blogspot.com/2020/02/2015.html

第五抱：困南北，拚未煞
→

第六抱：2016困難「三」伨（相伨）」
→

第七抱：2017音驚起行
→