昨昏上課時學生Gih-tah斷線去，趁這个機會來簡單紹介民謠吉他ê線（弦）。
「民謠 / 古典」主要是照吉他線ê材質來分類：
民謠吉他是鐵線（鋼線）；
古典吉他是Nylon線。
毋過其實Nylon線ê吉他除了古典演奏mā會凍彈唱Flamenco（華：佛朗明哥），鋼線吉他除了彈唱mā有人提來做純演奏...
轉--來咱主題：吉他ê鐵線（鋼線）
- 吉他六條線朗是鐵線
- 除了下跤尚幼兩條，頂懸四條（Wound String）有kńg（捲）無仝ê材質予in（怹 thay）會凍彈出卡低音而且線未sioⁿ（傷）粗無好chhih（拟）
- 一般定定看着黃銅（青銅；80/20Bronze）是80%銅佮20%siah（錫）ê合金（嘛有無仝比例ê）
- Phosphor Bronze / 紅銅是加入磷ê銅合金，看來卡紅，低音厚聲音卡「溫暖」。
- 除了尚時行彼兩種，mā有閣卡特殊ê弦，che（這）以後有閒沓沓仔來寫。
Cha-hng siōng-khò sî ha̍k-seng ê Gih-tah tn̄g-sòaⁿ--khì, thàn chit-ê ki-hōe lâi kan-tan siāu-kài Bîn-iâu Gih-tah ê sòaⁿ(hiân).
“Bîn-iâu / Kóo-tián” chú-iàu sī chiàu Gih-tah-sòaⁿ ê châi-chit lâi hun-lūi：
Bîn-iâu Gih-tah sī Thih-sòaⁿ (Kǹg-sòaⁿ) ;
Kóo-tián Gih-tah sī Nâi-lóng-sòaⁿ (Nylon Strings) .
M̄-ko kî-si̍t Nylon-sòaⁿ ê gih-tah tû-liáu kóo-tián ián-chàu mā ē-tàng tôaⁿ-chhiòⁿ Flamenco, Kǹg-sòaⁿ gih-tah tû-liáu tôaⁿ-chhiòⁿ mā ū-lâng the̍h-lâi chò sûn ián-chàu...
Tńg--lâi lán chú-tê: Gih-tah ê Thih-sòaⁿ (Kǹg-sòaⁿ)
- Gih-tah La̍k-tiâu sòaⁿ lóng-sī Thih-sòaⁿ
- Tû-liáu ē-kha siōng-iù nn̄g-tiâu, téng-koân Sì-tiâu （Wound String） ū kńg bô-kâng ê châi-chit hōo in ē-tàng tôaⁿ-chhut khah kē-im jî-chhiáⁿ sòaⁿ bē sioⁿ chhoo bô-hó chhih.
- It-poaⁿ tiāⁿ-tiāⁿ khòaⁿ-tio̍h N̂g-tâng(Chheⁿ-tâng; 80/20Bronze) sī 80% tâng kap 20% siah ê ha̍p-kim(mā-ū bô-kâng pí-lē ê)
- Phosphor Bronze/Âng-tâng sī ka-ji̍p Lîn ê Tâng-ha̍p-kim, khòaⁿ--lâi khah âng, Kē-im kāu siaⁿ-im khah “Un-loán” .
- Tû-liáu siōng sî-kiâⁿ hit nn̄g-chióng, mā ū koh-khah te̍k-sû ê hiân, che í-āu ū-êng ta̍uh-ta̍uh-á lâi siá.
Tō（就）算講是仝款材質ê弦，卡粗卡幼又閣有無仝ê影響：
相片內底兩組尚幼彼條朗是0.010 inch（英吋）下跤這組最後來到0.050吋，頂懸組甲若0.047吋。
我佇遮用一个簡單ê表來整理吉他線佮聲音ê關係：
幼 ← → 粗
響 ← → 厚
割甲會疼 / 拟甲會疼
Tō sǹg kóng-sī kāng-khoán châi-chit ê hiân, khah chhoo khah iù iū koh ū bô-kâng ê éng-hióng：
Siòng-phìⁿ lāi-té nn̄g choo siōng-iù hit-tiâu lóng-sī 0.01 inch(Eng-chhùn) ē-kha chit choo chòe-āu lâi-kàu 0.05-chhùn, téng-koân-choo kah-nā 0.047-chhun.
Góa tī chia ēng chi̍t-ê kan-tan ê pió lâi cheng-lī gih-tah-sòaⁿ kap siaⁿ-im ê koan-hē：
iù ← → chhoo
hiáng ← → kāu
koah kah ē thiàⁿ / chhih kah ē thiàⁿ
沒有留言:
張貼留言