🎸 吉他弦「衰退」的祕密：彈性疲乏

Peh-goe̍h tiong-ng sî-chūn góa ê Gih-tah khì ōaⁿ chi̍t-cho͘ chit-ê Hô͘-chhiu--ê John Pearse ê Gih-tah sòaⁿ.
八月中央時陣我 ê 🎸 Gih-tah 去換一組這个「鬍鬚ê」John Pearse ê Gih-tah線。

Thâu-ke teh siāu-kài sî ū kóng: Che siaⁿ chiok súi! Chin-chē lâng tī-teh ián-chhut chìn-chêng ē lâi ōaⁿ chit-ê pâi-chú ê sòaⁿ.
頭家teh紹介時有講：這聲足水！真濟人佇teh演出進前會來換這个牌子ê線。
m̄-ko khiàm-tiám sī chit-ê hó-thiaⁿ ê siaⁿ-im tòng bē kú, chin-kín tio̍h ē Soe-thè(Thè-hòa).
不過欠點是這个好聽ê聲音擋袂久，真緊着會衰退(退化)。

Hó-thiaⁿ ê siaⁿ-im góa sī iáu bô kài gâu khu-piat,
好聽ê聲音我是無介𠢕區別，
m̄-ko tī chit-chām-á khai-sí, góa ū kám-kak Gih-tah siaⁿ bêng-hián teh thè-hòa.
不過佇這暫仔開始，我有感覺Gih-tah聲明顯teh退化。

Tiâu-im sī Chún--ê, m̄-chai-á án-nóa tio̍h sī khiàm chi̍t-bī?
調音是「準ê」，不知á按怎着是欠一味？

Kin-á-ji̍t koh khì ōaⁿ sòaⁿ chóng-sǹg o̍h tio̍h chi̍t-khò,
今仔日閣去換線總算學着一課，
Tio̍h-sī Pîn-lu̍t ê būn-tê, im-chún/pitch ū-kàu, im-chit/tone khiàm Ko-pîn.
着是「頻率」ê問題，音準/pitch有夠，音質/tone欠「高頻」。
Kiat-kó tio̍h-sī thiaⁿ khí-lâi bô-kàu Hiáng.
結果着是聽起來無夠響。

 Pún-té siōⁿ beh Kán-tan siá siá--ê chò chi̍t-ê kì-lo̍k,
本底想欲簡單寫寫ê做一个記錄，
chit-má khòaⁿ--lâi iā-sī lò-lò-tn̂g chi̍t-phiⁿ ah...
這馬看來也是躼躼長一篇ah ：P

#Tâigí #Gihtah #Guitar #台語 #吉他

Kāu ōe-sái, kóng bô tiōng-tiám, Tiōng-tiám sī Tân-sèng lah!

厚話屎講無重點 ：P 重點是彈性lah！

 

Tio̍h chhin-chhiōⁿ chhiū-leng sok mi̍h-kiāⁿ, sok kú ah ē lēng--khì.

着親像樹奶束物件，束久ah會冗--去。

Gih-tah sòaⁿ Keng kú ah, i ê tân-sèng iā-ē thè-hòa.

Gih-tah線「弓」久ah，伊ê彈性也會退化。

 

Sui-jiân tiâu-im sī Chún--ê,

雖然調音是準ê，

in-ūi tân-sèng thè-hòa ê koan-hē, hit-ê Chún--ê siaⁿ-im sûi tio̍h cháu-cheng khì ah!

因為彈性退化ê關係，彼个準ê聲音隨着走精去ah！

iā-sī in-ūi tân-sèng ê koan-hē, im-chit thiaⁿ lâi bô-kàu Hiáng.

也是因為彈性ê關係，音質聽來無夠「響」。

 

Bāng-lō͘ lia̍h-lâi chit tioⁿ Hô͘-chhiu--ê ê pau-chong, góa ōe kah ū sêng hoⁿh!

網路掠來這張「鬍鬚ê」ê包裝，我畫甲有成hoⁿh！