濁水溪公社【Kúi Pān-sian 鬼扮仙】台語白話字歌詞

（台語白話字 Tâi-gí Pe̍h-ōe-jī）
Àu lâi-á ké phōng-kó, Ti-ko chò Hu̍t-tô.
Chiàⁿ-chhiú gia̍h-hiuⁿ tò-chhiú bong ne, siān-liông-lâng teh kng-kiō.
Phoat-bâ ké Sèng-lú, Káu-kang khùn bîn-chhn̂g, Ke-bó chē tōa-kiō.
Sîn-bêng sí tùi tó-ūi khì, pháiⁿ-lâng hó-ūn hiau-pai koh chhio-tiô.

Kúi pān-sian, lâi chiàm tōa-biō, Hû-á-chúi lóng-sī sái-liō.
Kúi pān-sian, kóng tō-lí chhùi-kak choân-pho.
Chia̍h-lâng-kàu-kàu thiⁿ-tē bô kong-tō, 
Lān-pha ùn bi̍t hōo lâng chn̄g.

Chhun-lûi chi̍t-hiáng lô, Chheng-bêng lâi chè-chóo.
Ka-kī bōe-seⁿ khan-thoa kui chhù-piⁿ, phōe-toaⁿ phoo chháu-chhio̍h.
Chhàu-thâu chòe Hông-tè A-pô-á bán-bīn Biō-kong khòaⁿ Pu̍t-jī.
Chham-pài Chhian-sòe chí-sī tâng-ki thong-lêng chhiáⁿ kúi the̍h kiù-io̍h.

Ngóo-hôo-sù-hái sī-sī-hui-hui, thian-hā siōng-chin pē-bú-sim.
Thiⁿ-lâm-tē-pak bông-biáu bô-piⁿ, Chhun-siau chi̍t-khek ti̍t chhian-kim.
Oo-mî-tô-hu̍t góa sī chia̍h-chhài-lâng.

（Kiò-bē：）
Thâu-ke lâi bé chhiⁿ-chhài oh. Che ka-kī chèng--ê, 
thàu-chá ùi Chiong-hòa Lô-chúi-khe hit-pêng chài--lâi-ê.
Oe-á-chhài 「大陸妹」, Tâng-o-á chi̍t-pé cha̍p-khoo lah！

Kúi pān-sian, lâi chiàm tōa-biō, Hû-á-chúi lóng-sī sái-liō.
Kúi pān-sian, kóng tō-lí chhùi-kak choân-pho.
Chia̍h-lâng-kàu-kàu Thiⁿ-tē bô kong-tō. 
Siuⁿ-hàm lah!

Kúi pān-sian, siăng(siáⁿ-lâng) kòo tōa-biō, Hû-á-chúi lóng-sī sái-liō.
Kúi pān-sian, chia̍h thâu-ke khùn thâu-ke-niû,
Pûn-ke-kui lán kiáⁿ-sun khóo-liân oh.
Hū-sim lóng-sī tha̍k-chheh-lâng.



（台語漢字 Tâi-gí Hàn-jī）
Àu lâi-á ké phōng-kó, Ti-ko chò Hu̍t-tô.
懊梨á假蓬果，豬哥做佛陀。
Chiàⁿ-chhiú gia̍h-hiuⁿ tò-chhiú bong ne, siān-liông-lâng teh kng-kiō.
正手攑香倒手摸奶，善良人塊扛轎。
 Phoat-bâ ké Sèng-lú, Káu-kang khùn bîn-chhn̂g, Ke-bó chē tōa-kiō.
潑猫假聖女，狗公睏眠床，雞母坐大轎。
Sîn-bêng sí tùi tó-ūi khì, pháiⁿ-lâng hó-ūn hiau-pai koh chhio-tiô.
神明死對佗位去，歹人好運囂俳閣鶺趒。

Kúi pān-sian, lâi chiàm tōa-biō, Hû-á-chúi lóng-sī sái-liō.
鬼扮仙，來占大廟，符á水朗是屎尿。
Kúi pān-sian, kóng tō-lí chhùi-kak choân-pho.
鬼扮仙，講道理喙角全泡。
Chia̍h-lâng-kàu-kàu thiⁿ-tē bô kong-tō,
食人夠夠天地無公道。
 Lān-pha ùn bi̍t hōo lâng chn̄g.
卵脬搵蜜予人吮。

Chhun-lûi chi̍t-hiáng lô, Chheng-bêng lâi chè-chóo.
春雷一響囉，清明來祭祖。
Ka-kī bōe seⁿ khan-thoa kui chhù-piⁿ, phōe-toaⁿ phoo chháu-chhio̍h.
家己袂生牽拖規厝邊，被單舖草蓆。
Chhàu-thâu chòe Hông-tè, A-pô-á bán-bīn, Biō-kong khòaⁿ Pu̍t-jī.
臭頭做皇帝，阿婆á挽面，廟公看佛字。
Chham-pài Chhian-sòe chí-sī, tâng-ki thong-lêng, chhiáⁿ kúi the̍h kiù-io̍h.
參拜，千歲指示，童乩通靈，請鬼提救藥。

Ngóo-hôo-sù-hái sī-sī-hui-hui, thian-hā siōng-chin pē-bú-sim.
五湖四海是是非非，天下上真爸母心。
Thiⁿ-lâm-tē-pak bông-biáu bô-piⁿ, Chhun-siau chi̍t-khek ti̍t chhian-kim.
天南地北茫渺無邊，春宵一刻值千金。
Oo-mî-tô-hu̍t góa sī chia̍h-chhài-lâng.
阿彌陀佛我是食菜人。

（Kiò-bē：）
Thâu-ke lâi bé chhiⁿ-chhài oh. Che ka-kī chèng--ê,
頭家來買生菜喔。這家己種ê，
thàu-chá ùi Chiong-hòa Lô-chúi-khe hit-pêng chài--lâi-ê.
透早ùi(對)彰化濁水溪彼爿載來ê。
Oe-á-chhài 「大陸妹」, Tâng-o-á, chi̍t-pé cha̍p-khoo lah！ 
萵á菜「大陸妹」、茼萵á，一把十箍lah！

Kúi pān-sian, lâi chiàm tōa-biō, Hû-á-chúi lóng-sī sái-liō.
鬼扮仙，來占大廟，符á水朗是屎尿。
Kúi pān-sian, kóng tō-lí chhùi-kak choân-pho.
鬼扮仙，講道理喙角全泡。
Chia̍h-lâng-kàu-kàu thiⁿ-tē bô kong-tō, Siuⁿ-hàm lah!
食人夠夠天地無公道。傷譀lah！

Kúi pān-sian, siăng kòo tōa-biō, Hû-á-chúi lóng-sī sái-liō.
鬼扮仙，啥人顧大廟，符á水朗是屎尿。
Kúi pān-sian, chia̍h thâu-ke khùn thâu-ke-niû,
鬼扮仙，食頭家睏頭家娘，
Pûn-koe-kui, lán kiáⁿ-sun khóo-liân oh.
歕雞胿，咱囝孫苦憐喔。
Hū-sim lóng-sī tha̍k-chheh-lâng.
負心朗是讀冊人。


※ 註解：

1. Sìn-bōng-ài su-ji̍p-hoat lāi-té siu-ji̍p ê sû "phòa-bâ",
1. 信望愛輸入法內底收入ê詞「破猫」，
chiàu góa ê kám-kak eng-kai sī "phoat-bâ" khah tio̍h.
照我ê感覺應該是「潑猫」卡着。
Án-ne kap "phoat-kâu" ū siong-tùi .
按呢佮🐒「潑猴」有相對。

"Bâ" sī Niau-kho ê tōng-bu̍t, 🐆
「猫」是「貓科」ê動物，
āu--lâi choàn-chò hêng-iông lâng chiok "iá-bâ".
後來轉做形容人足「野媌/猫」。


2. “ka-kī”, “ka-tī” sī khioⁿ-kháu chha. nā-sī 「自己」ē thak-chò “chū-kí”
2. 家己：「ka-kī、ka-tī」是腔口差，若寫做「家治」着是愛讀做ka-tī。若是「自己」會讀做「chū-kí」

3. “siăng” sī “siáⁿ-lâng” ê Liâm-im-jī. “sáⁿ-lâng” liâm-im ē piàn-chó “săng”
3.「siăng」是「siáⁿ-lâng 啥人」ê連音字。 「sáⁿ-lâng」連音會變做「săng」。　
　
4. “khóo-liân” kap “khó-liân” ē-tàng kóng sī Lâm-pak khiuo-kháu chha-pia̍t.
4.「苦憐」佮「可憐」會當講是南北腔口差別。
---------------------
原底ê歌詞：
奧梨仔假蘋果　豬哥做佛陀
正手押香　左手摸奶 　善良人佇扛轎
破麻假聖女　狗公睏眠床　雞母坐大轎
神明　死對叨去　歹人好運　嬈掰擱丘丟

鬼扮仙　來佔大廟　符仔水　攏是屎尿
鬼扮仙　講道理　嘴角全波
吃人夠夠　天地無公道　
懶趴搵蜜乎人舔

春雷一響囉　清明來祭祖
自己未生　牽拖歸厝邊　被單鋪草蓆
臭頭做皇帝　阿婆仔挽面 廟公看佛字　
參拜　千歲指示 童乩通靈　請鬼拿救藥

五湖四海是是非非 天下尚真父母心
天南地北茫渺無邊 春宵一刻值千金
阿彌陀佛 我係吃菜人

鬼扮仙 來佔大廟 符仔水 攏係屎尿
鬼扮仙 講道理嘴角全波
呷人夠夠 天地無公道

鬼扮仙 誰顧大廟 符仔水 攏係屎尿
鬼扮仙 呷頭家睏頭家娘
吹雞規 咱子孫可憐喔
負心都是讀冊人