嘉義「木都光影劇場」團長來夠台南佳里ê蕭壠文化園區駐村，創作 ê成果着是這齣《再見紅毛船》。
除了七月十六佇蕭壠A2劇場演出，koh經過半個月整理，仝款佇A2進行展覽。
我為這齣戲創作七字仔念歌kap主題配樂【Tâi-kang Hong-hûn 台江風雲】。
佇演出結束，koh進行演出精華kap幕後精華影片ê製作。
看A2空間ùi展覽場變做劇場，又閣變做展覽，真正是大工程！
chiah-nih精彩ê展覽，歡迎逐家有閒來去行行迺迺ê~
以下是【台江風雲】完整歌詞：
第一場：大船入港
Formosa美麗島，台灣歷史全全寶，今日行踏來上課，時空旅行有影無？
Formosa Bí-lē-tó,
Tâi-oân le̍k-sú choân-choân pó,
Kin-á-ji̍t kiâⁿ-ta̍h lâi siōng-khò,
Sî-khong lú-hêng ū-iáⁿ bô.
航海時代彼當時，西洋渡海做生理，熱蘭遮城ê街市，南來北往好地理。
Hâng-hái-sî-tāi hit-tong-sî,
Se-iôⁿ tō͘-hái chò seng-lí,
Jia̍t-lân-jia-siâⁿ ê ke-chhī,
Lâm-lâi pak-óng hó tē-lí.
第二場：逐鹿天堂
原住民族西拉雅，走揣歷史ê脚跡，西洋傳教來夠遮，羅馬文字通書寫。
Goân-chū-bîn-cho̍k Si-lah-iah,
Cháu-chhōe le̍k-sú ê kha-jiah,
Se-iôⁿ thoân-kàu lâi-kàu chia,
Lô-má bûn-jī thang su-siá.
第三場：熱蘭遮圍城
本土南島ê族群，唐山討海來開墾，大炮戰艦紅毛船，台江歷史起風雲。
Pún-thó͘ Lâm-tó ê cho̍k-kûn,
Tn̂g-soaⁿ thó-hái lâi khai-khún,
Tōa-phàu chiàn-lām Âng-mo͘-chûn,
Tâi-kang le̍k-sú khí hong-hûn.
第四場：長官與囚徒
海口水路來起懸，國姓軍隊拍台灣，熱蘭遮城無支援，投降議和名聲傳。
Hái-kháu chúi-lō͘ lâi khí-koân,
Kok-sèng kun-tūi phah Tâi-oân,
Jia̍t-lân-jia-siâⁿ bô chi-oân,
Tâu-hâng gī-hô miâ-siaⁿ thoân.
第五場：作客西拉雅
國姓荷蘭大決戰，時空旅行命相連，歷史文化齊展現，牽手約束結姻緣。
Kok-sèng Hô-lân tōa koat-chiàn,
Sî-khong lú-hêng miā siong-liân,
Le̍k-sú bûn-hòa chiâu tián-hiān,
Khan-chhiú iok-sok kiat in-iân.
------------------------------------
演出精華影片 → https://fb.watch/eJvqyXfYWl/
幕後精華短片 → https://fb.watch/eIW0TE1YPu/
沒有留言:
張貼留言