【Goe̍h-khîm ōaⁿ-sòaⁿ si̍t-giām pò-kò 月琴換線實驗報告】

Chìn-chêng tī bīn-chheh khòaⁿ-tio̍h chè-khîm A-úi-sai hun-hióng kóng: hó--ê Gih-tah sòaⁿ kî-si̍t tio̍h-sī tiò-hî-á sòaⁿ.
進前佇面冊看着製琴阿偉師分享講：好ê吉他線其實着是釣魚á線。

Siōⁿ-kóng góa chit-ki khîm mā chin kú bô ōaⁿ-sòaⁿ ah, kui-khì ka-tī lâi chhì-khòaⁿ-māi.
想講我這支琴嘛真久無換線ah，規氣家治來試看覓。
Khì tiò-kū-tiàm bé 50-pōng kap 30-pōng ê sòaⁿ, chhì-giām kiat-kó sī tio̍h chi̍t-pòaⁿ:
去釣具店買50磅佮30磅ê線，試驗結果是着一半：
Pún-té 50-pōng beh chò lāi-sòaⁿ(Khah chho͘ hit-tiâu), chng hó chhì-tôaⁿ kám-kak sioⁿ-nńg.
Kāng-khoán 50-pōng the̍h-lâi chò gōa-sòaⁿ, siaⁿ-im sǹg-kóng bē-bái.
本底50磅欲做內線（卡粗彼條），裝好試彈感覺傷軟。
仝款50磅提來做外線，聲音算講bē-bái（袂䆀）。
Tán--ê ū-êng the̍h 30-pōng hit-pau tńg-khì mn̄g khòaⁿ-māi kám ē-tàng ōaⁿ koh-khah chho͘--ê?
等--ê有閒提30磅彼包轉去問看覓敢會凍換閣卡粗--ê？

（19:50 chia̍h-pn̄g-pá keng-sin 食飯飽更新）
Āu-lâi ōaⁿ 80-pōng--ê chò lāi-sòaⁿ, siaⁿ-im, chhiú-kám lóng chin-hó!
後來換80磅ê做內線，聲音手感朗真好！
Ū phah iáⁿ-phìⁿ, tán--ê góa khǹg ē-kha.
有拍影片，等ê我囥下脚。

Ōaⁿ-sòaⁿ chhì-tôaⁿ iáⁿ-phìⁿ
換線試彈影片 → https://www.youtube.com/watch?v=OUr24qREk_4

[唸歌] 搖天滾地困難生活節 第五抱：困南北拚未煞（2015下半年）

the Epic Rock&Roll Poetry

長篇搖滾史詩《搖天滾地困難生活節》

Tn̂g-phiⁿ Iô-kún Sú-si 《Iô-thiⁿ-kún-tē Khùn-lân Seng-oa̍h-cheh》

頭前閣有四抱：

第一抱：2012困難年 → https://chanbunse.blogspot.com/2019/04/2012.html 

第二抱：2013困難起行 → https://chanbunse.blogspot.com/2019/04/2013.html

第三抱：正宗困難負二代 → https://chanbunse.blogspot.com/2020/01/blog-post.html

第四抱：2015困南北  → https://chanbunse.blogspot.com/2020/02/2015.html

↓2015年「小港」開唱 ＠大林蒲

「HoRyuKen 河流音樂祭」

Tē-gōo-phō:  Khùn Lâm-Pak, PiàⁿBē-soah	第五抱： 困南北拚未煞
73 Khùn-lân khùn-pak piàⁿ bē-soah, Kám-siā pêng-iú tàu ín-chhōa, Ū-thang chia̍h-chhēng bián thoa-bôa, Chi̍t-lōo sūn-sūi chiò hong-soa.	73 困難困北拚未煞 感謝朋友鬥引𤆬 有通食穿免拖磨 一路順遂少風沙
74 Khùn-lân sûn-hôe āu pòaⁿ-tang, Lâi-kàu Sin-tek Lâm-liâu-káng, Hái-ok chhan-tiám It-chit-páng, E-àm káng-piⁿ sûn-chêng bāng.	74 困難巡迴後半冬 來夠新竹南寮港 海屋餐點一級棒 下暗港邊純情夢
75 Sûn-hôe Biâu-le̍k bô khiàm-khoeh, Iô-kún Hôo-chhiu im-ga̍k-hōe, Tiong-o̍h ha̍k-seng lâi kui-ōe, To̍k-li̍p kí-pān bô-tè chhōe. （6/27 Biâu-le̍k Choân-jîn Tiong-o̍h）	75 巡迴苗栗無欠缺 搖滾鬍鬚音樂會 中學學生來規畫 獨立舉辦無塊揣 （全人中學「搖滾鬍子」）
76 Bîn-kan lú-siā miâ Hái-he̍k, Hoa-lian hái-piⁿ ū te̍k-sek, Soaⁿ-niá bí-kéng hái phek-ge̍k, Gē-bûn chhī-á chàu koa-khek. （7/09 Hoa-lian Hái-he̍k Hong-chhī-á）	76 民間旅社名海或 花蓮海邊有特色 山嶺美景海碧玉 藝文市仔奏歌曲 （海或瘋市集）
（7/16 Sit Down @ Chu-lô-san） 77 Ka-gī Wake Up im-ga̍k-chè, Chú-pān lâng sī siàu-liân-ke, Lán pān khùn-lân Sit Down cheh, Iô-kún sńg-chhiò thôo-kha chē.	77 嘉義覺醒音樂祭 主辦人是少年家 咱辦困難Sit Down節 搖滾耍笑塗跤坐
78 Chē-tī chhù-téng Chu-lô-san, Í-chá sok-siā ê khong-kan, Kū tē hō-miâ bē han-bān, Wake Up Sit Down lóng chiaⁿ chán.	78 坐佇厝頂諸羅山 以早宿舍ê空間 舊地號名未頇慢 覺醒坐下朗成讚
7/25 Hô-liû Im-ga̍k-chè / HoRyuKen Fest	河流音樂祭
79 Pat-sian lo̍k-hn̂g chhut ì-gōa, Chhī-hú bô-liōng koh lám-nōa, Hái-iûⁿ-chè soah hōo khan-thoa, Lán pān Hô-liû-chè lâi chiap-sòa,	79 八仙樂園出意外 市府無量閣荏懶 海洋祭煞予牽拖 咱辦河流祭來接紲
80 Hô-chè hō-miâ HoRyuKen, Hohaiyan sī kā siau-khián, Khai-hòng pò-miâ lâi piáu-ián, Téng-chin pī-pān bô khi-phiàn.	80 河祭號名升龍拳 Hohaiyan是共消遣 開放報名來表演 頂真備辦無欺騙
81 Pat-lí Tām-chúi hô Chó-hōaⁿ To̍k-li̍p iô-kún thang seⁿ-thòaⁿ Chheⁿ-kông pī-pān sî-kan kóaⁿ, Kám-siā ta̍k ê sio pàng-phōaⁿ.	81 八里淡水河左岸 獨立搖滾通生湠 青狂備辦時間趕 感謝逐个相放伴
10/17 iô-kún Pān-toh × iô-kún pāng-song	搖滾辦桌×辦喪
82 Khòaⁿ ián-chhiòⁿ-hōe chia̍h Pān-toh, Khùn-lân káu-koài mah chhui lo̍h, Iô-kún Pān-song pān tī toh? Hô-piⁿ kong-hn̂g thiàu Bàn-boh.	82 看演唱會食辦桌 困難狗怪嘛推落 搖滾辦喪辦佇佗 河邊公園跳曼波
83 Hô-piⁿ kong-hn̂g ê sóo-chāi. Ian-chhiân iô-kún tāi-seng lâi, Koh ū kí-pān Nōa-bú-tâi, Iô-kún Pān-song chhì-khòaⁿ-māi.	83 河邊公園ê所在 煙腸搖滾代先來 閣有舉辦爛舞台 搖滾辦喪試看覓
84 Iô-kún Pān-toh im-ga̍k-chè, Hoe-phok hn̂g-khu ê tiôⁿ-tē, To-goân chiat-bo̍k bú-tâi chē, Mah ū bián-chîⁿ phiò bián bé.	84 搖滾辦桌音樂祭 花博園區ê場地 多元節目舞台濟 嘛有免錢票免買
85 Chhoo-tōa-Band m̄ sī chia̍h-sái, Hō-miâ chhiò-khoe mā ū lāi-châi, E-poo Pān-toh sió bú-tâi, E-àm piàⁿ kàu Pān-song lâi.	85 粗大Band毋是食屎 號名笑詼嘛有內才 下晡辦桌小舞台 下暗拚夠辦喪來
86 Tiong-o̍h ha̍k-seng gín-á kiáⁿ, Hì-gâm lâi hō ga̍k-thoân-miâ, Phah-phìⁿ soan-thoân sī chin piàⁿ Ké-ì oan-ke kăng heh-kiaⁿ.	86 中學學生囡仔囝 肺癌來號樂團名 拍片宣傳是真拚 假意冤家仝嚇驚
87 Môa-tāu Pe̍h-iū pau-chong-chóa, Lâi pau chhiòⁿ-phìⁿ chin hi-hoa, Pān-song ê keng-hùi khò chia lâi poa̍h, koh Sàng lín Hok Lo̍k Siū ê Kim-chóa.	87 麻豆白柚包裝紙 來包唱片真虛花 辦喪ê經費靠遮來跋 閣送恁福祿壽ê金紙
88 Khùn-lân ha̍p-chi̍p lâi kái-pán, Ǹg-bāng oa̍h-tāng thàn lân-san, Tiôⁿ-tē pháiⁿ-chhōe lōo-tôo lân, Liáu-chîⁿ piàⁿ-miā soah bô thàn.	88 困難合輯來改版 向望活動趁零星 場地歹揣路途難 了錢拚命煞無趁
89 Pau-chong kái-pán bô chhìn-chhái, Ha̍p-chi̍p siau-lōo sǹg bē-bái, Ta̍uh-ta̍uh-á bē mā ē-sái, Khùn-lân oa̍h-tāng ùi chia lâi.	89 包裝改版無凊彩 合輯銷路算袂䆀 沓沓仔賣嘛會使 困難活動對遮來
90 Khùn-lân ha̍p-chi̍p iá-bē liáu, Koh hoat chhiòⁿ-phìⁿ toh chi̍t chiau, Bo̍k-bêng Mōo-hiám ū kî-biāu, Kám-sī m̄ kiaⁿ pak-tóo-iau.	90 困難合輯猶未了 閣發唱片佗一招 莫名冒險有奇妙 敢是毋驚腹肚枵
《Bo̍k-bêng kî-biāu ê Mōo-hiám》	《莫名奇妙ê冒險》
91 Sèⁿ(Sìⁿ) N̂g pún-miâ hō Nâ-pe̍h, I siōng ài thak ang-á-chheh, Tâi-pak chāi-tē iô-kún kheh, Chhòng-pān Khùn-lân Seng-oa̍h-cheh.	91 姓黃本名號藍白 伊上愛讀尪仔冊 台北在地搖滾客 創辦困難生活節
92 Iô-kún ga̍k-thoân Lô-chúi-khe, Hō-miâ pún-thóo hó chú-tê, Tō sī Lô-thoân ê koan-hē, Góa hō gē-miâ Chanbûnsè.	92 搖滾樂團濁水溪 號名本土好主題 tō是濁團ê關係 我號藝名曾文細
93 N̂g Nâ-pe̍h ka Chanbûnsè, Nn̄g-lâng káu-koài chhut-thâu chē, Phōaⁿ-chàu ha̍p-chhiòⁿ liān-siáu-ōe, Khùn-lân thian-thoân Pe̍h-lān-sè.	93 黃藍白加曾文細 兩人狡怪齣頭濟 伴奏合唱練痟話 困難天團白爛細
(12/05 Tōa-nâ-pôo Sió-káng Khai-chhiùⁿ)	大林蒲「小港」開唱
94 Sió-káng chng-thâu Tōa-nâ-pôo, Chá-chêng Ko-hiông ê mn̂g-hōo, Káng-kháu kang-tiôⁿ tn̄g mn̂g-lōo Siáⁿ-lâng chai-iáⁿ gún khóo-chhóo.	94 小港庄頭大林蒲 早前高雄ê門戶 港口工場斷門路 啥人知影阮苦楚
95 Sió-káng chāi-tē ê chheng-liân. ŪI--tio̍h ka-hiong pān piáu-ián, Kang-tiôⁿ chō-sêng oo-àm-thian, Kiò gún poaⁿ-chhù chin liáu-jiân.	95 小港在地ê青年 為着家鄉辦表演 工場造成烏暗天 叫阮搬厝真了然
96 Sió-káng Khai-chhiùⁿ ū an-pâi Chhōe lán Khùn-lân chòe-tīn lâi, Hōng-lîm-kiong chêng tah bú-tâi, kā Chāi-tē ê khùn-lân pò lâng chai.	96 小港開唱有安排 揣咱困難做陣來 鳳林宮前搭舞台 共在地ê困難報人知
97 Nâ-pe̍h choan-chi̍p lâi sûn-hôe, Koa-iú chù-bûn thê-chá bóe, Ko-hiông Pîn-tong ū kè-ōe, Saⁿ-kang liân-sòa cháu ná poe,	97 藍白專輯來巡迴 歌友注文提早買 高雄屏東有計畫 三工連紲走那飛
98 Pōng-bí-phang tī Se-á-oân, Kū-chhù hoan-siu hó liû-thoân, Khiā-tī soaⁿ-phiâⁿ bô jōa koân, Óa soaⁿ khòaⁿ hái te̍k-sek choân.	98 磅米芳佇西子灣 舊厝翻修好流傳 徛佇山坪無偌懸 倚山看海特色全
99 Gē-bûn-lâu tī Pîn-tong-chhī, Tùi-bīn chi̍t-keng ê Hu̍t-sī, Kàu-hōe sok-siā khiā chit-ūi, Gē-bûn khai-hòng tē-it nî.	99 藝文樓佇屏東市 對面一間ê佛寺 教會宿舍徛這位 藝文開放第一年
100 Chit-phō kàu-taⁿ 100-pha, Iô-thiⁿ-kún-tē ê koa-á, Kám-siā ta̍k-ê lâi khan-kà, M̄-kiaⁿ Khùn-lân kòe seng-oa̍h.	100 這抱到今一百葩 搖天滾地ê歌仔 感謝逐个來牽教 毋驚困難過生活

NEXT → Tē-la̍k-phō: 2016 Khùn-lân Saⁿ-Thīn

第六抱：2016 困難「三伨」